Cəzadan qaçmaq istəyənlərə qaçmaq cəzası

Yazaq görək nə olur?

Cəzadan qaçmaq istəyənlərə qaçmaq cəzası!

Əslində bu mövzu barədə bir, bəlkə də bir neçə dəfə yazmışam. Lakin böhranın hələ də davam etdiyini görüb, bir də başqa prizmadan yanaşaraq, məsələnin önəmini bir daha oxuyuculara çatdırmaq istədim. Başlıq azca qəliz olsa da, yazının sonunda izah olunub.

Problem nədir?

Hamımız cəzadan qaçmağa çalışırıq, xüsusən də əgər bu cəza İlahi cəzadırsa. Sizcə kimsə yaxşı iş gördüyünə görə cəzalandırıla bilərmi? Bəlkə də bu halı dünyada təsəvvür və müşahidə etmək mümkündür. O zaman sualı daha dəqiq verək. Sizcə Allah kimisə yaxşı iş gördüyü üçün cəzalandıra bilərmi? Sual qəribə olsa da, cavab daha təəccüblüdür: Bəli, mümkündür.

Necə yəni? Doğurdan da belə bir şey mümkündür? Yəni bir nəfər müsbət, xeyir, yaxşı, bəyənilən, alqışlanan, bəh-bəhə layiq iş görür və Allah tərəfindən cəzalanır? Bəli, mümkündür. Nəinki xeyir iş, hətta bəzən namaz kimi vacib bir əməli icra edənlər də buna görə cəzalanır. Çoxlarınız “ağ eləmə” desə də, mümkündür əzizlər!

“Misal çək görüm” deyirsinizsə yazını oxumağa davam edin:

Misan 1: Təsəvvür edin, namazın qəza olmasına 5 dəqiqədən az vaxt qalıb. Dəstəmaz alıb, təkbir demək istədiyiniz anda qışqırıq sədaları eşidirsiniz. “Kömək edin, boğuldum!”. İslam, şəriət, Allah deyir ki, belə bir vəziyyətdə, əgər onu səndən başqa xilas edə biləcək biri yoxdursa namaz qılmamalı və onu xilas etməlisən. Əgər onu xilas etməyib, namaz qılsan cəzalanacaqsan.

Misal 2: Yuxarıdakı misalı oruc üçün də vurmaq olar. Oruc olan halda başı tamamilə suya salmaq orucun batil olmasına səbəb olar (bəzi müctehidlərimizə əsasən). “Onu xilas etmək üçün suya atılsam orcum batil olacaq. Mən bunu edə bilmərəm. Mən orucumu poza bilmərəm” desəniz, orucu pozmadığınıza görə cəzalanacaqsınız. Yəni oruc tutub, cəzalanırsınız.

Bu misalların sayını artırmaq olar.

Nə demək istəyirik?

Əzizlər, demək istədiyimiz budur ki, biz elə bilirik ki, yalnız pis iş gördüyümüz zaman Allahın sözündən çıxmış olur və cəzalanmağa layiq görülürük. Xeyr, belə deyil! Bəzən yaxşı iş görüb də, cəzalanmaq olar. Bunun ictimai işlərdə yüzlərlə misalı var. Bunun üçün tarixə baxmağımız kifayətdir.

Quranın bu ayəsini unutmayaq: "De: Sizə əməlləri baxımından (axirətdə) ən çox ziyana uğrayanlar barəsində xəbər verimmi? O kəslər ki, onların dünyadakı zəhməti boşa getmişdir. Halbuki onlar yaxşı işlər gördüklərini (və bunun müqabilində mükafata nail olacaqlarını) zənn edirdilər." (Kəhf 103-104)

Nə edək?

Tövsiyəmiz budur ki, diqqətli olaq! Yaxşı iş görürük adı ilə özümüzü aldatmayaq. Təhlil edək, araşdıraq, vəzifəmizi düzgün təyin edib, düzgün addımlayaq. Yəni hər yaxşı işi, ən düzgün formada yox, ən düzgün işi ən düzgün formada görək! Bir də unutmayaq ki, hər yaxşı və faydalı iş zəruri iş hesab olunmur. Bəzən zəruri olmayan faydalı işlər günah və israf hesab olunur və bununla da insanın cəzalanmasına və enerjilərin hədər yerə itirlməsinə, bununla da cəmiyyətin tənəzzülünə gətirib çıxarır.

Yazının başlığının izahı: “Cəzadan qaçmaq istəyənlərə qaçmaq cəzası”

Bəzən biz, cəzadan qaçmaq üçün hansısa işi yerinə yetiririk, lakin həmin iş bizim həqiqi vəzifədən qaçmağımıza, dolayısı ilə cəzalanmağımıza səbəb olur. Yəni cəzadan qaçmaq istərkən, vəzifədən qaçmaq cəzası ilə üzləşirik. Bu səbəbdən çox diqqətli olmalıyıq!

Allah hamımıza həqiqi boşluq və ehtiyacları tanımaqda və onu doldurmaqda yardımçı olsun!

Ruhullah Novruzzadə